من ورا شيش بيتنا

يوم بيعدي زي التاني
ومفيش حاجه خلاص وحشاني
الشيكولا هيا الطعميه
والفاكهه طعمها سوداني
قلت اسلي نفسي شويه
فتحت الشيش ووقفت ابص
اللي رايح شبه الجاي
كله بيشرب قهوه وشاي
فجأه لقيته جاي من بعيد
شاب حليوه وشكله سعيد
تنحت لحظه واستنيت
ودا ماشي ياعيني عليه
كأنه ملك حشيته حواليه
قلت اركز معاه واشوف
لقيته بيبص لفوق فخوف
بصيت انا كدا في كسوف
راح وشي جايب الوان
وهوه شكله كان هيمان
ودخلت اجري ابص لشكلي
وقلت دا شكله جاي لاهلي
من ورا شيشنا لقيته ماشي
تحت بيتنا هدي الخطوه
انا قلت الدنيا بتضحكلي
كل ما ابص القيه يسبلي
فضلت اتخيل هيكون ايه ردي
ومين معايا ومين يجي ضدي
ولقيت الشيش بيضحكلي
وكأنه مش عاجبه شكلي
قلتله حتي انت ياشيش بيتنا
مستكتر علينا فرحتنا
لقيته فجأه قلب جماد
لا رد ولا قالي ميعاد
سبتني منه دا شيش حقود
وجريت جوه وكلي وعود
حتي مرايتي ببص لقيت
وشي سعيد وكأنه العيد
وبسرعه علي اهلي جريت
قلت اكيد هسمع اخبار
لقيته واقف قدام بابنا زنهار
فتحوا الباب وانا واقفه بطير
من جوه سمعت الصوت غاب
رحت اشوف ايه الحدوته
اتريه غلطان في العنوان
والضحكه كانت مش ليا
دي لبنت جارتنا ام حنان
هوه كان فعلا هيمان
بس في الدور اللي فوقينا
سرحانه جابه لشقتنا
يعني انت صح ياشيش بيتنا
تسبيله
ضحكته
حتي مجيته
مش لينا
سرحت فيا وفخيالاتي
يقولوا عليا ايه ياخواتي
فوقت فجأه علي زغاريط
قلت للشيش انت عبيط؟
انا اصلا مش عايزه عريس
انا نفسي بس في اطمئنان
حد احس معاه بأمان
حد حنين اوي دفيان
طلعت اجري وانا فرحانه
امي قالتلي مالك تعبانه؟
اصلها قليل ما تشوفني سعيده
لا ياماما
دانا طالعه ابارك للجيران
ربنا يتمم بالخير كمان
ولما الاقي نفسي زهقانه
اروح بسرعه عالشيش اقفله
اصلي ياشيشنا مش عايزه عريس
انا عمري لسه في اوله
انا عايزه اخ واب وصديق
مش بس حبيب انا عايزه طريق
انا محتاجه لمليون حاجه
مش لمجرد دبله وشقه
قال وتقولي جاي عريس
اما انت ياشيشنا عليك تهييس
مش هفتحك ابدا تاني
غير لما نعلق الفوانيس
رمضان قرب قلبي سعيد
مش هفضالك انا من جديد
ومش هبص منك تاني
غير في اول يوم العيد
هتوحشني لحد ساعتها
اه ياشيش بيتنا يابو العريف....

اشاره مرور ؟

اشاره مرور

صاحي مالنوم متنرفز
وهيا صحيت مخنوقه
فنجال قهوه بس بوش
هيا بتشرب عصير فريش
هينزل شغله متسربع
اخدت كشكولها المربع
اسانسيرها كان عطلان
ونزل يجري هوه كمان
الدنيا في الشارع زحمه
والجو حر والكل في لخمه
كان هيعدي الشارع شافها
وقف ................... اتسمر
وفحضنها كشكولها مسطر
بصت عالجمب التاني شافته
سرحت طبعا في حضرته
راحت تعدي وقع الكشكول
اتلخبطت وجبته علطول
وهوه كان واقف ::: مذهول
ووقفت اشاره المرور
زحمه ومتاخر بس مسرور
لا هيا عارفه تروح عنده
ولا هوه عارف ليها يروح
قال لنفسه بصوت مدبوح
دي هيا مش شايفه عنيا
وهيا قالت ايه يلفت نظره ليا
الشارع بقا بحر كبير
والعربيات مراكبه
والناس دول سمكه
وهما كل واحد علي شط
غرقان في حنينه
وهيا عايمه فاحلامها
ياتري اسمها ايه
ياهل تري بيشتغل فين
مرت ثواني بسنين
وهما لسه مكانهم متسمرين
نفسه الوقت ميعديش
نفسها الاشاره متمشيش
طب يعديلها ويسالها عن اسمها
هيا هتعديله وتقوله ايه اللي بيها
رسموا ورسموا جبال احلام
وفلحظه عم الارض سلام
وفجأه مشيت اشاره المرور
مشيت وكل واحد فيهم عبر
لا سألها عن اسمها
ولا قالتله ازاي شغلها
وكل واحد منهم فات
نسيوا امالهم في لحظات
لا قال صباح ولا ابتسم
ومحدش فيهم حس بندم
بتشوف كل يوم فتي احلامها
وهوه بيشوف اميره خياله
لا بتعرف هيا توصله
ولا يقدر هوه يعديلها
طول مهو حلم بيبقي جميل
لو يتحقق يبقي كلام
بس لامتي هيفضل يحلم
ولامتي هتبني اوهام
ياما نقابل ناس اوقات
نخسر كتير لما نفتهم
وناس خسرنا معاها حجات
عشان يادوبك نعرفهم ؟
وعدت اشاره المرور
وعدت معاها الذكريات

سامحيني يابلدي

مش باقي فينا ولا حتي الدم لا العيش بيشبعنا ولا السم

مش باقي فينا غير القهر والندم المتعاص بالمر

لو فينا شويه جلد علي عضم بلاش يغرقوا مع عبارات السلام بلاش يتنسفوا مع بيوت المقطم

دي النخوه ضاعت مع من ضاع والبنت سابها راجلها تتباع وتبيع نفسها عشان لقمه

ليه يابلدي قسيتي علينا لا انتي ارتحتي ولا اتهنينا

ويقولك ام ؟؟؟ ام مين لا مؤخذه دي عايزه واعظ يوعظها كام وعظه

او شيخ يأدنلها في ودنها ويوشوش بصوت عالي ويقولها

ماتوا ولادك وما لبستي السواد

ماتوا وضاع خلاص وقت الحداد

وقبل متحاسبيهم حاسبي نفسك

خدوا منك ايه غير ميه نيلك المتلوث بدمهم

خدوا ايه غير رغيف عيش بايت اقل من حقهم

حياتنا ياامه كلها طوابير ما يقف فيها الا الفقير

ليه بتاخدي منا كل جميل وتسيبلنا مالذل كتير

بلدي غنينالك مواويل وانتي غنيتي علينا

غمينا عنينا عشان نمنعها تشوف قساوتك فينا

بلدي ارحمينا وان كنا مش ولادك اتبري منينا

يمكن لو بقينا اغراب تعرفي بالخير تعاملينا

اوعي في يوم تعيبي علي اجيالك مهي بسببك خابت

وخاب املهم فيكي

مش باقي غير شويه خير في نيلك في ارضك في ناسك

سامحيني بس مفيش ام بترضع ولادها الهم

وليه بعد مكنتي سعيده بقيتي بتشعي غم

صوتي اتنبح في نداكي لم تسمعي الندا

ليه الشر فيكي اصبح حقيقه مؤكده

ليه الغلابه ملو كل حته فيكي وبقيتي كانك طفله مشرده

ضيعتي احلامنا في مدارسك المتحجره

كسرتي اقلامنا بسلطتك المتبعثره

واحنا ياعيني علينا غلابه

يقولولنا احتجوا نقول عيب دي ماما

ولحد امتي ياماما تردمي ايامنا بطمي نيلك

تمسحي احلامنا بموج بحورك وريش طيرك

تشطبي اسامينا من علي سورك

لو مش ولادك اتبري منينا بس كفاياكي قسوه وذل فينا

لو مش ولادك اطردينا يمكن ساعتها نلاقي ام تانيه تحن علينا

سامحيني سامحيني

بس مفيش ام بترضع ولادها الهم .......... مفيش ياامه

ليه يابلد

انا بس دلوقتي عرفت معني اغنيه ايمان البحر درويش وهوه بيقول( يابلدنا يابلد هوه من امتي الولد بيخاف من امه لما في الضلمه تضمه )
ياخساره يابورسعيد ياخساره
لازم يخاف منها لما يلقيها في الضلمه بتخنقه بتكتم نفسه بتمنع عنه الهوا والحياه
حد يقولي لما ارجع بعد خمس سنين في اسكندريه لبلدي بورسعيد اللي كنت بحبها اوي وراضيه بكونها صغيره ومازال فيها جزء متخلف ارجع الاقيها بقت خرااااااااااابه . وكل دا ليه عشان مجموعه من المستثمرين الكبار قرروا انهم يحولوها لمجموعه من القري السياحيه اللا منتهيه وكل دا ايه ياناس علي قفا اهلها للي مش عايش في بورسعيد احب اقوله انها محافظه جميله علي البحر المتوسط وفيها قناه السويس اللي بتوصلنا بالبحر الاحمر وانهم بدل ميستغلوا موقعها المتميز قفلوا البحر ليصبح قاصرا علي (اللي معاه والي معهوش ميلزموش) محدش متخيل القهر اللي انا فيه لما اسيب بلدي من خمس سنين ببحر ارجع القيها من غير بحر ياريتهم ردموه كان اسهل لكن للاسف البحر كله قري سياحيه لمن يمتلك المال قري محدش بيدخلها اصلا لان بورسعيد مفيهاش اثار ولا مناطق سياحيه عشان حد يعد فيها اكتر من يومين. يقدروا يقولولي المسؤلين بيبنوا القري دي لمين ؟ ولمصلحه مين؟ مصلحه مين ان البحر يتسد انهم يسدوا علينا جوا البلد الميه والنور عشان قله قليله من البشر هتدخل القري دي
حتي شاليهات المحافظه اللي كانت بأجور ذهيده وكان اهل البلد بيأجروها في الصيف اتهدت قال ايه مبقاش شكلها حلو عشان يتبني مكانها قري برضه وبعد مكان الشاليه دورين ونبقي من جوه شايفين البحر جت القري اربع وخمس ادوار عشان تسد كل حاجه علينا زي منكون ملناش حق نعيش في بلدنا تخيلوا لما تصحوا الصبح تلاقوا كورنيش النيل مش باين من الابراج والنيل بقا قاصر علي ساكني الابراج دي .دا ظلم دا اجحاف لا وايه حتي شارع طرح البحر اللي كان مليان مطاعم وكافيهات مختلفه الاشكال والالوان هدوها كلها لانها اخده مساحه تصلح لبناء قريه سياحيه حسسوني اني في شرم الشيخ وعملوا مجمع مطاعم في مساحه لا تتعدي تمن المساحه الاصليه ولموا فيه كل المطاعم والكافيهات اللي مبنيه من اول مالبلد اتعمرت وطبعا ايجار مول المطاعم الجديد غالي وبيطلع علي الناس اللي بتروح تاكل هناك ليه بيخربوا كل حاجه حلوه في بلدي حتي ديلسبس ياناس شالوا منه الحديد وردموا الميه تحته ليصبح ديليسبس متحجر بعد مكنا واحنا اطفال نعد علي الحجر بتاعه ونشوف تحتينا السمك بيجري في الميه بقا دلوقتي تعد عليه وتشوف بلاطات ومحلات قال ايه عشان لما السفن ترسي السياح ينزلوا يشتروا وللعلم السياح عندنا لا يغادروا ظهر المركب او السفينه الا علي الاتوبيس اللي هياخدهم علي القاهره او شارم او خلافه كأننا مرض معدي هنقتل السياحه وهنضربها يعني اصلا السياح مبيدخلوش جوه البلد ولا بيعدوا المينا يبقي محلات ايه بلا نيله...................
البلد خربت ماتت ماتت وبقولها بالمعني الحرفي بلدي ماتت بلدي اللي كنت بحبها بلدي اللي كانت بتفضل صاحيه مبتنمش بورسعيد اللي كانت فاتحه محلتها اربعه وعشرين ساعه بقيت توقع فيها الابره الساعه 11 ترن علي الارض من كتر مشوارعها فاضيه وتجارتها نايمه
بلدي ماتت مش بتحتضر زمن الاحتضار عدي وفات ومحدش مديلها ايد بلدي خلاص ماتت ومبقتش بلدي مبقتش بورسعيد اللي كبرت فيها بقت مسخ
انا عايشه في بلد مسخ بلد للي معاهم وبس بلد القري السياحيه برغم عدم وجود سياحه بلدي اللي كان كل شاب بيشتغل فيها بقي كل شبابها عاطل مش لاقي حته يروحها ولا حاجه يعملها طبيعي انه تكتر فهيا السرقه والقتل بعد مكنا معتبرينها اكتر بلد امان في مصر ويقولك هنعملهم بدائل هيا فين البدائل فين مشروع توشكي اللي اتصرف عليه ملايين فين مشروع شرق التفريعه الي كان مخصص لاهل بورسعيد فين الصناعه الي قلتم هتنموها ياجماعه احنا بلد تجاري من يوم متخلقنا ازاي تحولوها بلد زراعي وارضها ملحات غير صالحه للزراعه وازاي بلد صناعي وانتم بتهدوا المصانع اللي داخل كردون المباني والله انا مش فاهمه حاجه يعني قفلتم علينا التجاره ومتنفعناش زراعه ولا صناعه ولا السياحه ماشيه يبقا بقيلنا ايه نعيش منه باقي للبلد ايه يابشر مخلاص كله راح كله ضاع كله اتكسر والفضل لكبار المسؤلين والفضل لكبار المستثمرين احب اقولهم مشاريعكم فاشله ومش هتدخلكم غير الخساره لان اهل البلد مش هيدخلوا القري دي غير في المناسبات والسياح مبيدخلوش البلد اصلا اموت واعرف عاملينها لمين ؟
كل حاجه حلوه في بلدي هديتوها تحت شعار السياحه المختفيه اصلا
ياجماعه ارحمونا ارحموا اللي باقي منا ارحموا تاريخنا ارحموا ناسنا الكبيره الست العجوز تيته والراجل العجوز الحاج ارحموهم من انهم يشوفوا بلدهم الجميله مسخ حقير مبيستفدش منه غير ناس تتعد عالصوابع والباقي يموت يموت الشعب ويحيا المسخ
حاليا متمشيش في اي شارع غير لما تشوف الزباله عايمه في الشارع
حاليا الدنيا بقت ضلمه اوي بعد مكانت كل الشوارع نور
حاليا بقت بلد محبش اسكن فيها
بدل متهتموا بهدم كل ذو قيمه وبناء ما ليس له قيمه نضفوا البلد نضفوها رجعوها للي كانت فيه رجعوا ضحكه اهلها بدل مكل واحد بقا ماشي مش بيفكر غير في الاكل هياكل ايه وبكام ومنين حرام عليكم ارحموا من في الارض ارحموا شعب بورسعيد من خططكم الفاشله من تقفيل البلد كفايه تخنقونا اكتر من كدا كفايه حرام

بلونه بيضااااااااااا

بنت صغيره حلمت يوم
حلم بسيط مش متعالي
حلمت لما تقوم مالنوم
تلقي مزاجها اصبح عالي
ومفيش للحلام اسوار
تشرق شمس جديده عليها
تملا حياتها بالافكار
نونو صغير ضحكه بر يئه
لون بحر وسما وخضار
تنزل مطره تنقي الدنيا
زي الدمعه بتمسح حزن
كل الكون احلو في ثانيه
والشخابيط دي نوع مالفن
حلوه الدنيا بس نعيشها
زي مفيها دمي اتصفي
فيها اوقات الدم يحن
فوق السطح فيه ولد واقف
بطيارته الورق كان فارح
كان متواضع جدا جدا
عمره مبص لحد بقرف
البنت كانت اخت الولد
ومن سعادتهم قلبي انسعد
الضلمه لو بتريح عيني
النور في عنيهم اريح
بلونه للكل فيها مطرح
تطير تقع من غير متجرح
وحياه مليانه الوان
لعب وورود وسوبر مان
ان جت يوم فيه عنيا تئن
القي ضحكه طفل ترن
لما الدنيا بتضحك اضحك
وان جت تبكي اديها ضهرك
صوره اختي في قمر الليل
حبي لامي واقول مواويل
حتي اخويا في زعله اصيل
اما الحزن ياناس كفايانا
كتر الحزن يهد الحيل
بنت وولد كانوا اتنين
صبحوا تلاته وبقوا ملايين
حب الدنيا وهيا تحبك
وان جت يوم تغدربك اجري
كله يلف وانت الدغري
عشها بسيطه زي مهيا
امسك مج واشرب ميه
طير مالفرحه وحب كمان
واوعي تنام وانت زعلان
حب حياتك اهلك ناسك
والبلونه الي حبساك
اخرج بره قيودك واعرف
الدنيا لو مش مامتك تبقي باباك

خدعوك

ايها المخدوع الضعيف اتصدق ما تسمعه من الثناء
انك لا تعرف ما تريد وتتخيل ان لديك قدر من الذكاء
واغربتاه انسيت من انا ام لا تذكر من كثره الاسماء؟!
احببتني يوما غابرا قبل ان تتقلب بك الاهواء
كنا نحيا ببعضنا وننتظر المواعيد ووقت اللقاء
عشنا الحياه الي ان تحولت عن حبي لتفعل ما تشاء
اصبح وعدك لي هزل وكلماتك مثل كلام الشعراء
منذ متي تعلمت الكذب منذ متي تعلمت الادعاء
مات الشوق بيننا وانتحبت كل ما بيننا من اشياء
لم اعد استشعر بعينيك النسيم و توقفت عن تنفس الهواء
اقتلعت حنيني اليك ولم تحاول العوده الا للافتراء
يامن اعطيت له الدنيا لم اخذ منك شيأ سوي الهباء
اطوال الامد تخدعني اانا احمل هذا القدر من الغباء؟
خدعوك بانك عظيم وما انت الا بحصي في وعاء
اذهلني ما بك من بريق وما تواري به نفسك من بهاء
يالك من تعس ضئيل في الارض كنت او في السماء
وهذا ذمبي فيمن وثقت وهذا ما حصلت عليه من جزاء
مت عطشا ايها العليل فلن امنحك قطره ولا شربه ماء
لا اراك اانت خفي ؟ واين تعدادك ابين الموتي ام الاحياء؟
حسبي ربي لن اسامح ولكل قدرعند ربي حكم وقضاء
قد يلقي بك في اليم غريق او تتعذب جوعا وتتوه في الصحراء
لن يساعدك احد ولن يسمع لك صوتا او يلبي لك نداء
حارب حتي نفسك وقد تتناثر وتصبح اجزاءك اشلاء
تدور في دائره لن تحيا سعيدا لا سراء ولا ضراء
اتقول اني خاسره احكمت نفسك شيخا في دار الافتاء
في كل الاحوال لياليك لن تري عينك فيها سوي البكاء
وتذكر وقتها ايامي وما كان لي من بهجه وغناء
لتبلي مثلما يذبل الزهر وكما المسير في جنائز العظماء
ينفطر قلبك علي ما فاتك وتشكو زلك لاجدادك القدماء
لتعرف معني الالم وتعبر عن الاوجاع كابلغ البلغاء
وتنتهي ككاتب لوجيعه او ملحمه مثل روايه البؤساء
لن يختلف عليك اثنين ولن تجتمع حولك الاراء
لا تلين مشاعري حولك لن يجدي ما تصدره من نوح ورجاء
كالطيرلا ياخذ من الندي الا كما ياخذ من الغني الفقراء
عش عابثا كن هازئا تعس وان تجمع حولك الابناء
انت لا شفاء لك وكيف لي ان اعالج المرض بالداء
كن كما تكن وكما تريد وانعم بالحياه وسط مجموعه من التعساء
لا تنتظر نهايه مفرحه فانت من اخترت حياه البغاء
يامن اعتقدتك حدائق الفاكهه ما انت سوي ارض جرداء
ولن تنل ما تمنيت لان نهايتك دوما حمقاء

صوت من بعيد

اخاف ان اخونك او ابيعك او تضيع فما احبك ولا اتحمل لك العيش في السقم
وما انا بلهيب النار لاحرق قلبك وما انت بحطب لتحترق وفي النار تضرم
صوتك من بعيد يناديني ببكاء ولا استطيع تلبيه نداءك ولا حتي ان ابتسم
تجهش بالبكاء اغفر لي علي الصغير ان يشب وعن امه ينفطم
لا تعيًني قاضيا علي حياتك لست انا للقانون دارسه ولا انت بمتهم
لا تذهب الي مكان زرناه معا لا تردد لحنا سمعناه معا لا تذكرنفسك بالالم
زهرتك انا اذبلتها سامحني اعطف عليا وزل احساسي بالندم
بحر غريق اخشي عليك الهلاك يلقيك هنا وهناك الي ان تصل الي العدم
يالها من ماساه ومعاناه فوقها معاناه لا تتمسك بطرق مسدوده نهايتها النار والدم
لا تكن احمق وتحارب نفسك تدلل علي حبي لك تذكرالحقيقه ودع الكلم
ان قلت افتقدك اصبح احبك ؟ الا تستطيع ان تعيش دور الصديق بغير ندم
صديقي لسنا في حرب اتنتظر ان امتطي الجواد واشهر سيفي لانهزم
لم يعد لقيس وليلي مكان هاهنا وان كان فليس انت قيسي ولا انا ليلاك فلا تصطدم
فلتراعي ما بيننا ودعني بسلام تخاف علي حزني فلا تجعلني اريك منه الاجم
اصارحك بما في قلبي بوضوح ولم تر مني خديعه ولا مكر ولا لؤم
ابعد عينيك عني فالدنيا مليئه بالنعم ودع كل منا يعيش حياه المحترم
كن كريما واتركني بغير ذنمب تعودت دوما انك اهل للكرم
حب بلا مقابل هو الضيع في جحيم بغير رحمه او مغنم
لا تنهي حياتك علي من لم تحبك ولا تجعل امالك بيديك تتحطم
علم نفسك من جرحك ولا تضع جهلك علي راسك كمن باخطاؤه يتعمم
اجعل حبك لغيري طريق ولتظل احلامك امامك تتجسم
دعني اسير وسر انت في طريقك ولا تعيش في خفاء كالملثم
لماذا تترد في الحديث بماذا تريد اخباري لماذا عندما تراني تتلعثم؟
انا البحر في احشائي والنار في انفاسي والفلك تجري في قلبي المتيم
عجيب ان تدرك ان حبي لك وانه ليس هنا وغريب الخطأ عليك ايها المتعلم
اتريد التمسك باي حب يجرحك انك تفني حياتك وتجعل نفسك هرم ينهدم
عذابك ليس دواؤه عندي فلم اطلب منك غرامي ولكن اجعل حياتك تنتظم