مين ؟ مش واخده بالي!!!!!!!!!

لو حد قالك الكلمه دي هتحس بأيه؟ حد تعرفه كويس اوي تلاقيه مش عارفك او انت مش عارفه -
الناس في الدنيا مش مجرد صور الناس معادن يارخيصه (يانفيسه ) نفيثه يامتحوله
-زميل عزيز ورفيق الكفاح بالكليه المحترمه اكيد عارف نفسه دلوقتي وهوه بيقرا الكلام دا قد ايه انسان محترم ومثقف وذو فكر عالي (طبعا دا اللي عايز تسمعه ايوه انت متبصش وراك) هوه فعلا انسان كويس بس فيه مشكله واحده بس الانا العليا والانا الوسطي والانا الصغري والانا ثم الانا مش هتكلم في علم النفس لكن هتكلم عن ناس انا عرفتها وفرحت بمعرفتها وناس عرفتها وندمت اني عرفتها
-زميلي العزيز انا افخر بمعرفتك برغم عقده النرجسيه اللي انت فيها صحيح ياجماعه هوه مش اناني بس بيحب نفسه مين فينا مبيحبش نفسه ؟ بس مش انه يمدحها طول الوقت صح ياباشا بس تعرفوا هوه فعلا احسن حد انا عرفته بس عشان انا معرفش كتير هاهاهاهااها اظن كدا ارضيت غروره بما فيه الكفايه بس علي الله متقريهاش لكل الشعب المصري وتتنفخ لحد متفرقع حلو اوي اننا نعرف قيمه نفسنا لكن وحش اننا نؤمن اننا الاحسن لان ديما بيكون فيه الاحسن مننا حلوه الثقه بالنفس. تخيلوا انا نفسي يكون عندي نص ثقه زميلي في نفسه

بالنسبه للناس ممكن تيجي في يوم تبص لهدومك وتقول انا ازاي اشتريت الهدوم دي انا اكيد كنت عبيط اوي ساعتها
الهدوم زي الناس فيها اللي بيفضل جديد الغالي الي تمنه فيه وفيها الرخيص بس لذيذ والغالي اللي ملوش اي شكل ومتعرفش بينتجوه ليه وايه سر غلاه رغم ردائه شكله وفيها الرخيص تمنا ووظيفه
الصعب انك تعرف كل الانواع فس نفس الوقت فتكره الرخيص الخسيس والغالي المتعالي وتدور علي نوع مش موجود مبينزلش السوق يالي تمنه فيه يالرخيص الذيذ
ازاي حد يسيطر عليك ويحولك من حاجه غاليه لحاجه رخيصه وازاي عقولنا بقت حمير متساقه بكرباج وياريت اللي بيسوق احسن منك دا حمار زيك ويمكن اكتر حموريه بس يمكن لابس اشيك
من امتي بنحكم عالانسان بلبسه وشكله وظروفه الاجتماعيه وعلاقته بالناس ياما ناس شكلها حلو ومن جوه وحشه اوي
مشكلتي في الدنيا ان علاقاتي محدوده لكن عرفت كل الانواع يمكن عندي نوع من الغباء الاجتماعي لكني بعتبره ذكاء يمكن مش عايزه اعرف ناس كتير واندم علي معرفتها بس بقول لكل حد كويس مقابلتوش انا اسفه اني منتبهتش لوجود انسان اسفه لاني كنت خايفه اعرف الحلو يطلع وحش

ازاي تعرف حد سنين ويتقلب في يومين هيا دي المشكله يتحول من صديق لعدو يتحول من حد بترتاحله وتحب تتكلم معاه لحد متطقش تسمع صوته ازاي يبقي عكسك في كل حاجه وشايفك غلط وانت شايفه غلط هوه شايفك معقد ومقفول وانت شايفه رخيص وغير مسئول ازاي يشوف كل ايد بتمد لمساعدته انها شر وحد بيكرهه

سؤال مهم ليه محدش بيقبل النقد ويحاول يصلح من نفسه ليه بيحاول يأكد انه كدا بختياره؟ ليه بنفخر بالغلط مع علمنا انه غلط؟
لو حد خسر صاحب وصديق بيعزه اوي هيفهم كلامي

ياصديقا كنت عونا ليا بالحيات كيف تحولت وصرت رسول للممات
من هذا الذي قتل المشاعر بداخلك وتحولت القيم الي اشتاء وفتات
حال التغير بيننا وزهور صداقتنا تاهت ضائعه بين نيل وفرات
فقدت احساسي بحبك منذ نسيت انت ما كان بيننا ما مر وما فات
مرت سنوات العمر امامي وانت فيها واقف بلا حركه في ثبات
احاول ان ايقظك فلا تبالي بوجودي وصار بكائي مجردصيحات
لم اعد احتمل الحياه وحولي انقاضك ولا املك سوي حسرات
ضاقت بيا كل السبل وتظن عتابي لك هراءات وادعائات
ليس بيدي حيله سوي البعد فانت غير من عرفت هيهات
كيف تعود الروح لنقائها وتحيا فيها الرقه والانسانيات
اذا لاقيت صاحبي بالله عليك ذكره بانه لم يترك لي الا الاهات

نرجع مرجعونا للمعادن وحلقه جديده ووسط الجمهور

النهارده هنسال السيد مسؤل وزاره الوزارات عن موضوع المعادن وان الناس بتختلف في معادنها تبع اشكال تربيتها واللي اتعودت عليه والصراحه سيادته فدنا جدا واكد سيادته علي ان المعادن في مصر كويسه وحلوه وبنت حلال وقاربت علي الانتهاء وصرح سيادته انه سوف يتم عقد صفقه مع الاتحاد السوفيتي السابق والمافيا الروسيه لاستيراد المعادن علي اختلاف اشكالها وانها بعد كده في المستقبل القريب ان شاء الله سوف توجد في متناول اليد للجمهور متوفره في اكياس حاليا بالاسواق شريط جديد لحاتم فهمي ...........ااقصد شريط جديد من المعادن عشان اي حد يحب يغير معدنه الدنيئ يشتري معادن السيد المسؤل الي صرح انه تبع اتفاقيه الجاد او الي مجتش هتلغي كل الجمارك اللي علي اكياس المعادن المستورده واللي هيتكتب عليها صنع في مصر رغم انها مستورده ولما سالنا سياده المسؤل في النقطه دي وضح سيادته مشكورا ان احنا هنجبها في براميل من بره واحنا اللي هنعبيها في الاكياس المستورده برضه ودا طبعا عمل ومجهود جبار تحت اشراف فريق العمل الاجنبي والخبراء الاجانب اللي استوردناهم........... ااقصد تعاقدنا معاهم من اجل الاشراف علي العمال المصريين والي اكيد في وسطهم عمال اجانب (اصل ياحرام غلابه الاجانب عندهم بطاله عاليه ومرتب العاطلين مش بيكفي الا يادوب ايجار الشقه والاكل واللبس طب يعيشوا ازاي يموتوا من الجوع مثلا ..........عشان كده تفضل سيادته بتعينهم قبل العمال المصريين تضامنا مع الشعوب الاوروبيه) اه كنت بقول المجهود الجبار اللي هنقوم بيه عشان كده هيكون من حقنا وضع كلمه صنع في مصر علي اكياس الشبسي ............يوه اقصد اكياس المعادن .........هو احنا كنا بنتكلم في ايه اصلا ؟؟؟؟؟؟؟؟؟؟؟ااه اه افتكرت الناس معادن اقصد اكياس المعادن المصنعه في مصر وفي النهايه بنشكر سياده المسؤل اللي اتعطف واتكرم واتلطف وساب البسين مخصوص لمده 5 دقايق عشان يعمل معانا الحوار العظيم ده والذي لن تنساه البشريه وبنشكر حضرتك انك طمنتنا علي مستقبل النفوس البشريه ....ااقصد الاكياس المعدنيه ..........يعني مستقبل الصناعه المصريه اللي مبقيناش نخاف عليها ابدا من يوم مسيادته مسك وزاره الوزرات وهي وزاره التربيه والتعليم ............
ونلقاكم في حلقه جديده من حوار مع مسؤل والحلقه القادمه ان شاء الله هنستضيف السيد مسؤل الاعلام لكي نتحدث في مشكله صعوبه الامتحنات في المراحل ما قبل مرحله الروضه ...........الي اللقاء علي راي اخونا اللي قالوا مهو (من كل لون يابطيسطه)واللي ملوش مسؤل يجيب اي مسؤل حتي لو مبيفهمش في البطاطس ......يعني هي الناس اللي خلاص بتفهم اهو هبل في الجبل وكله عبط في عبط وشويه هبل بيضحكوا علي شويه معاتيه

ايه اللي بيحصل ؟؟؟؟؟؟؟؟؟؟؟؟؟؟؟؟

اعزائي المشاهدين اهلا بكم في نشره الثالثه
نبداها بعوده الرئيس بسلامه الله من الاراضي الاسرائليه بعد رحله استمرت سته اشهر لدراسه مشكله انقراض الحوت الازرق وقد صرح سيادته باهميه اتحاد مصر مع الشعوب الاوروبيه للقضاء علي انفلوانزا القطط وقد اعلن مسؤل من وزاره الخارجيه ان المرض قد وصل الي قطه السيد الرئيس الامر اللذي اقلقه وتوجه سيادته مباشرا صوب اسرائيل لاجراء المباحثات اللي اثمرت عن استبدال قط سيادته بقط سيامي يهودي اصيل من نوع mb4

وننتقل الان الي الوضع في الاراضي الفليسطينيه ومعنا مراسلنا مروان ابو خيشه اخ مروان ما مستجدات الوضع لديكم بالارض المحتله
والله اخت سلمي الوضع هنا لا يبشر بالخير

· فوسط الصراعات الداميه وخاصا بعد اهداء امريكا الجندي الآلي لاسرائيل واللذي يقوم بجميع مهام الجندي البشري من قتل واهدار للدماء وخلافه من المعتاد لاراحه الجنود الاسرائيل قررت فلسطين رفض الدعم المقدم لها من الدول الشقيقه واللذي يحوي احدث الالات الحربيه والمعدات واعلنت انها لن تغير من اسلوب مقاومتها وان الحجاره هي الطريقه الوحيده لانهاء الاحتلال وان استخدام اي اسلحه اخري يعتبر تخلي عن المباءئ و الاصاله وتدمير لقوانين حقوق الانسان وقانون الحرب مع اسرائيل وانها سوف تحارب بالاحجار حتي اخر حجر في القدس ولذلك قرر كبير المفوضيه الاسرائليه بعد ان سائه حال الفلسطنين استيراد شحنه احجار وطوب تصل كميتها الي 500 مليون طن من الدول المختلفه مساهمه منه في مساعده الشعب الفلسطيني وحتي تكون الحرب متكافئه بين الطرفين في الوقت نفسه اعلن مسؤل الحركه الشعبيه الفلسطينيه عن ضروره تغير علم فلسطين ليحل محله العلم الجديد فيه رمز الحجر والجندي الالي مروان ابو خيشه قطاع الاخبار التلفزيون المصري فلس.....طين

وننتقل الان من الوضع في الاراضي المحتله الي العراق ومعنا عبر الهاتف الاخ خليل ربنا يديله العافيه اخ خليل ما الوضع عندكم في العراق :
· والله اخت سلمي ليس الوضع باحسن حال من الاراضي المحتله فبرغم كل الانفجارات المدويه في جميع ارجاء المدينه الي الان الا ان اميريكا قد اعلنت وقف اطلاق النار منذ ثلاثه ايام بالرغم انها هي من تتطلق النيران الا انها تقول انه دفاع عن النفس ضدد الهجمات الارهابيه التي تستهدف المواطنين الاميريكين في العراق لزعزعه العلاقات بين الشعبين الشقيقين اميريكا والعراق وقد اعلن مسؤل سياسي تخين المستوي ...ااقصد رفيع المستوي ان اميركا لم تحقق غايتها من العراق بعد وان خطط التنميه اللتي اعدتها اميريكا لاعمار العراق وتنميته والتي نراها جليه واضحه لم تحقق بعد كاملا وانه تبعا للخطه التدميريه ااقصد الخمسيه القادمه سيتم هدم جميع المنشات في البصره وبغداد لزعم المسؤل انهم يريدون توحيد شكل المباني الجديده وسوف يرفع عليهاالعلم االاميريكي ان شاء الله فور بنائها وانه لمفخره للعراق ان تشهد تنميه شامله علي يد الولايات المتحده الاميريكيه وقد صرح المحامي المتولي الدفاع عن الرئيس العراقي المخلوع صدام حسين انه سوف يتم تبرئته من جميع التهم المنسوبه اليه( وانه هيخرج منها زي الشعره من العجين ان شاء الله) واعلن سيادته علي ان الشخص الذي تتم محاكمته الان ليس بصدام الحقيقي وانه دوبلير وان صدام الحقيقي مازال حر طليق بعيدا عن ايدي امريكا وقد اذيع ذلك في شريط صوره صدام الحقيقي في احدي المنتجعات السياحيه في مكان مجهول الهويه وقال فيه ان الشعب العراقي كله صدام وانه ما ان يتم معاقبه هذا الصدام المسجون سوف يظهر صدام جديد علي الفور وفي نهايه الشريط (طلع لسانه لاميريكا وقالها طظ) مما اثار غضب القوات الميريكيه وصارت تبحث في جميع الاماكن الممكن تواجده فيها الا ان نتائج البحث بائت بالفشل ولم تسفر عن جديد ونحن هنا في البصره في انتظار نتيجه استفتاء للشعب العراقي عن رايهم في زياده عدد النجوم في العلم الاميريكي الي 105 نجمه من هنا خليل ربنا يعطيني العافيه قطاع الاخبار لجمهوريه مصر العربيه البصره.
· شكرا اخ خليل وننتقل الان الي باكستان والعراق والتقرير الاتي من مني عبد المسيح عن الاوضاع هناك وقد اكدت مراسلتنا انه لم يعد هناك اي اخبار جديده بهذا الشان حيث ابيدت هذه البلاد نهائيا ولم يعد لها اي مكان علي الخرائط الحديثه وانه سوف يتم انشاء دوليتن امريكيتنين في هذه الاماكن وان ماتبقي من حيوانات تسكن المنطقه تم وضعها في معتقل جوانتانمو علي انها تابعه لتنظيم القاعده وتم استجوابها واستخدام جهاز كشف الكذب واكدت نتائج التحليل الاوليه علي بلاهه مكتسبه من الاشعاعات النوويه وعدم قدره الكائنات تلك علي الاجابه علي اسئله الخبراء الاميريكين مما ادي الي خوف القيادات الاميريكيه وقرار محكمه العدل الدوليه باعدامها جميعا لتصنيفها جواسيس من دول معاديه هذا اخر التقرير شكرا
·
· ننتقل الان الي الاوضاع الداخليه وقد افتتح صباح هذا اليوم السيد محافظ القاهره مستشفي الكلب الجديد والمدعم من الدوله واعلن انها تم انشائها في عشر سنوات فقط وتحت مساعدات اجنبيه واكد سيادته ان المستشفي مستعده لاستقبال جميع الحالات التابعه لمستشفي المواساه وذلك بعد اربعه اعوام من تاريخ الافتتاح حتي تكون المستشفي استعدت من الناحيه الطبيه
· وتم تحت رعايه السيد الرئيس وضع حجر الاساس امشروع عملاق واللذي لم يحدد بعد ما هو او فيما يستخدم ولكن سيادته اشار الي اهميه التعاون الدولي والمحلي في مواجهه الارهاب العالمي وان مسيره التطور سوف تسير بخطا واسعه( لارج سيز )لا محال
· في ظاهره غريبه جديده من نوعها ولد طفل بسته ايادي وقد اعلن الدكتور المشرف علي ولادته انهم عالجوا جينات الطفل حتي يستطيع مواكبه العصر السريع فولد بسته ايادي لكي يمارس جميع المهام التي تسند اليه وهو مصمم خصيصا لاداءالاشغال الحكوميه الروتينيه من كتابه شكاوي والرد عليها واعلن الدكتور وفريق العمل انه من المنتظر تعديل هذا الطفل بآخر احدث منه يملك12يد وله خواص اخري منها عدم وجود عقل حيث وجد الاطباء انه لا جدوي منه في مثل هذه النوعيه من الاطفال ذات القدرات الروتينيه وسوف يتم توظيف هذا النوع في مكاتب استقبال الشكاوي لسماع الشكاوي واخراجها من الجانب الاخر

ظاهره اخري من غضب الطبيعه حيث بينما العالم وجزر سونامي تغرق في السيول والامطار والصواعق والبراكين واحتراق الغابات في العالم هنا في مصر وفي حادث اليم ومروع اصيب اثره 5 اشخاص حيث سقطت شجره مليئه بلبطيخ المهجن علي العائله اثناء تناولهم الفسيخ في احدي الحدائق العامه واللذي اسفر عن الاصابه بجروح غير خطيره علي الاطلاق حيث كانت شجره البطيخ الجديده لا تزال تنمو تحت اشراف فريق عمل مكون من مهندسين زراعين واطباء ومدربين دوليين للاشراف علي نمو الشجره السليم حتي تعمم في جميع حدائق مصر وبعد هذه الفاجعه الوحيده من نوعها قرر المسؤلين ازاله الشجره من جذورها ووضعها بالمتحف الحربي كاثر من اثار الحرب العلميه وسوف تتاح مواعيد مخصصه لزياره الشجره المذكوره وتعلن مسبقا

حادثه اخري حيث سقوط عماره في احد الاحياء الفقيره في القاهره وقد كانت العماره بنايه حديثه تم تسكينها قريبا مما ادي لحدوث العديد من الخسائر الماديه والبشريه وقرر المسؤلين معاقبه صاحب العقار والمهندس القائم عليه حيث لم يتم البناء تبعا للقوانين ولم يستخدم في البناء اسمنت اسيوط واستخدم اسمنت قنا مما ادي الي وقوع العقار وتم اصدار احكام مشدده بدفع غرامه قدرها 50جنيه علي الفرد المتوفي وشراء شكارتين اسمنت الاسيوط لترميم العقار كانت هذه اخر الاخبار المحليه.


والان مع النشره الاقتصاديه ويقدمها الزميل مينا برولس التاني عشر
في نشرتنا الاقتصاديه اليوم ارتفاع الدولار بمقدار100%وانخفاض الجنيه المصري في البورصات العالميه وبورصه مصر والاسكندريه بمقدار85% وهي معدلات لم يسبق ان حدثت في التاريخ من قبل
اما عن سوق الاوراق الماليه فارتفعت اسهم الشركه المصريه للاتصالات وموبينيل والو وفودافون ودجاج كنتاكي ومؤمن للاغذيه لتسجل اعلي ارتفاعات لها في السوق الماليه
اما عن مصر للصناعات الغذائيه والصناعات الالكترونيه
والصناعات المعدنيه فقد انخفضت فيها الاوراق الماليه
واقفلت اليوم ورقتان ماليتان من فئه 100 جنيه
واقفلت شركات اسمنت اسيوط وشركات البترول المصريه وشركات الغزل والنسيج وجميع شركات مصر او المساهمه المصريه
اما عن سعر الدهب اليوم فقدانخفض سعر الدهب الي 800 جنيه الجرام
والي هنا انتهت نشرتنا الاقتصاديه شكرا للمتابعه

من جديد في اليوم العالمي لحمايه الفار الابيض تحدثت مسؤله حمايه البيئه بالولايات المتحده الاميريكيه عن اهميه الفار الابيض والرمادي والاسود والبني في المجتمع واهميه حمايه هذه الانواع النادره من الانقراض ولذلك ارسلت مصر طائرتين محملين بافئران الرماديه والسوداء الي اميركا مع مجموعه اطباء محترفين للعنايه بهم في السفر وذلك لحل ازمه الفئران وانقراضها ويتم الان تهجين السلالاه البيضاء الاميريكيه الاصل بالسلاله الرماديه المصريه لانتاج سلالات رماديه فاتحه او بيضه مبقعه رمادي وذلك لتفعيل الصداقه والاخوه المصريه الاميريكيه

اما عن النشره الجويه فتنقلها لكم الاخت ميمونه

اعزائي المشاهدين نحيط علم سيادتكم ان الجو غدا ان شاء الله ممطر وعاصف وتوجد شبوره فعلي الاخوه المسافرين اخذ الحذر وتخفيف الملابس اما عن اليوم فالجو حار حار حار علي العاصمه ومحافظات الوجه القبلي والبحري مع وجود امطار حامضيه علي ساحل البحر الاحمر وامطار مش حامضيه علي الساحل المتوسط
اما عن حالتي البحر الاحمر والمتوسط
فارتفاع الامواج يزداد في الصعود حيث يصل ارتفاع الامواج في البحر الاحمرالي100متر مما يعوق حركه الصيد والملاحه
اما عن الامواج في البحر الابيض المتوسط فيصل الي 200 كجرام مصحوب بالرمال الاتيه من شبه الجزيره الهنديه

وتقابلنا غدا رياح شماليه جنوبيه شرقيه غربيه اتيه من نيوزيلاندا والنرويج تؤثر علي مصر العليا ووسط الدلتا
اما عن السحب فاكثرها منخفضه الي متوسطه تثير الضباب صباحا وتسيطر علي المناطق الجنوبيه من مصر وقاره افريقيا
بالنسبه لدرجات الحراره المتوقعه اليله وغدا باذن الله فبيانها كالتالي


البلد
العظمي
الصغري
القاهره
55
20
الاسكندريه
20
2.3
شرم الشيخ
70
0

كفر الشيخ
84
5
بورسعيد
30
30
سوهاج
22
-5
حلايب وشلاليت
00
-0

اما عن درجات الحراره في باقي الدول العالميه فبيانها التالي

البلد
العظمي
الصغري
العظمي
الصغري
العظمي
الصغري
العظمي
الصغري
الصغري
المغرب
2
1
ليبيا
3
22
طرابولس
العظمي
الصغري
300
5

الولايات المتحده الاميريكه
-000000000
00000000
باريس
20000
00030
لوندون
3345536
256485
صفت اللبن
2-5
066


الي هنا سيداتي آنساتي تاتي نهايه نشره الثالثه الي اللقاء بعد اقل من خمسه دقائق
اعلانات ونواصل

المهم ان الاخبار مبتخلصش وخصوصا الاخبار الوحشه مفيش اكتر منها
موجز الانباء
توفي الي رحمه الله السفير المصري في الاراضي العراقيه والاراضي الفلسطينه وقد اصر المسؤل انه لن يرجع السفراء المصريين الموجودين في باقي دول النزاع اما يقوموا بواجبهم او يلقوا حتفهم دونه
عاد الي ارض الوطن سالما الاستاذ نجل السيد الرئيس بعد رحله علاج علي نفقه الدوله استمرت ثلاثه اشهر لتنظيم اسنانه في لندن
وقد اعلن سيادته بعد العوده ان الاستقبال كان حافلا في لندن وخاصا عند زيارته لديزني لاند واكد علي ان سفر الكبار للعلاج في الخارج ما هو الا تفعيل للعلاقات المصريه الاوروبيه وان الدولارات التي تنفقها الدوله في علاج كل من هب ودب من قرايب الناس الكبيره مبترحش هدر وان كلها بتتصرف في حجات مهمه وممكن نكمل اخبار النهارده بكره الصبح عشان الوقت ازف والديك ادن والمفروض ننام ربع ساعه عشان نقوم نقول العناوين وبعدين نشره اليوم الجديد عمتم مساء اقصد عمتم صباحا

علي جمب لو سمحت؟!!!!

هنتكلم النهارده عن الموضه يعني الجديد اللي بيمشي وراه كل الناس
كانه دستور مع انهم مبيمشوش علي الدستوردا بالعكس بيحبوا موت
يخالفوه زي ميكون العدو الاول للدوله يعني القانون يقول شمال كل
الشعب وامه لا اله الا الله تمشي طبعا بدون شك يمين يقولوا
يجماعه اربطوا الحزام وانتم بتسوقوا كل اللي عنده حزام يروح
يشيله يقلك حزام ايه ياعم اللي يقيدني المهم ان الدوله اتعودت علي
كده وكمان الشعب فالشعب قرر يسيب الدوله تقول اللي هي عيزاه
بس علي شرط يعمل هو كمان اللي هو عيزه واللي دائما وابدا بيكون
عكس الدوله مبتقول وزي مالشعب قرر كده الدوله كمان قررت
تعمل اللي هي عيزاه بغض النظر مش عن وجهه نظر الشعب وبس
لا عن وجود الشعب اساسا عشان كده الدوله عملت نفسها عبده
العبيط علي الشعب وتصرفاته فكان لازم الشعب هو كمان يعمل عبده
العبيط عن سرقه الدوله وقوانينها وكل طرف منهم فضل انه يسيب
الطرف التاني يعمل اللي هو عايزه ويعمل نفسه مش واخد باله وكل
واحد شاف ان
كده احسن له عشان يكبر الطاسه ويريح الانفوخ علي راي الناس
الهييسه القديمه المهم ان موضوع الشعب والدوله دا ملوش نهايه
والمشكله ان الدوله مفكره الشعب غبي والشعب مفكر الدوله فاهمه والاتنين الحقيقه غلطنين بس نعمل ايه الدوله خدت علي سرقه الشعب واستهباله والشعب خد علي عدم اطاعه اوامر الدوله واستهبالها وبقت دي الحاله الوحيده الي بيلف فيها عبيط علي اهبل بدل ملفوف علي ملفوف المهم ان الدوله تتبع مبدا( انما الاعمال بالنيات ولكل امرئ ما نوي) وبصراحه هي نيتها خير ان شاء الله عشان كده محدش له حاجه عند الدوله لان تبع المثال ده المفروض نعتبر ان المستشفيات اتبنت والمناهج اتصلحت والاتوبيسات فاضيه والناس مرتاحه ومفيش سرقه ولا اي مشاكل والمرتبات والمعاشات زادت وفاضت وغطت وديون مصر خلصت والشعب المصري عنده اكتفاء زاتي وبيصدر (بيصدر الطارشه طبعا ) والحياه بمبي والدنيا ربيع والجو بديع والشعب لما لقي الموضوع كده فقال هو كمان يتبع نفس المنهج هو كمان اعتبر انه بنيته بيادي شغله علي اكمل وجه وبيعمل اللي عليه وزياده وبينفذ القوانين بالحرف ومفيش احسن من كده شعب انتظام ايه وانضباط ايه ونظافه ايه وبكده يبقي الاتنين خلصوا زمتهم من ربنا ومحدش عايز من حد حاجه ما علينا المهم في الاخر ان المشكله دي ملهاش حل لان كل من طرفي النزاع مبسوط باستعباط الطرف الاخر ومعتمد علي نيته في عمار البلاد والحمد لله عشان كده قررنا نقفل الموضوع ده ونرجع للموضه وعلي راي المثل مجنونه ياقوطه الموضه كمان مجنونه النهارده فرو الكلب بكره شعر الحمار بعده لا فرو ولا شعر ولا لبس خالص يعني موضه بقي .؟ وطبعا بنشوف العديد من النماذج المشرفه الي تتبع الموضه وهي عميا او مغمضه العين بغض النظر عن هتناسبهم ولا لا عشان يبقي الشاب الروش وتبقي البنت الموديرن الهاي كلاس والشيخ يرجع شباب ويبقي موضه ويلبس الاحمر والاصفر والاورانج ما علينا من اللون بس السنه دي موضه الكلب او الحمار او الزرافه او اي حيوان اليف او غير اليف هنشوف البشر مشين بالزي الرسمي للحمار من اعلي الراس الي اخمص القدم وطبعا محدش يقدر يتكلم دي موضه واللي عملها فنان .............. ومش بس فنان لا عظيم كمان...............
المهم (رزق الهبل علي المجانين) هنشوف الفرو في عز الصيف عادي ونشوف الناس من غير هدوم في الشتا برضه عادي مهي موضه واحلي حاجه فيها انها مبتعتقش كبير من صغير بنشوف التخينه لابسه الضيق وشبه الشوال المتدحرج والرفيعه برضه لابسه الضيق زي العصايه الممصوصه ومحدش يقدر برضه يتكلم دي موضه ياجماعه والي هيمشي مخالف للموضه هيتقال عليه دقه قديمه ومش استايل فازاي يتقال عليه كدا لا ميصحش نروح نلبس الحجاب علي الموضه ومعاه الميني والميكرو جيب مهي موضه طب نعمل ايه بس نلبس بوت نص كم وهو كله ماشي التخين يلبس فاتح فيزيد تخنه والرفيع يلبس غامق ويزيد نحافته وكله ماشي والعزاء واجب علي فرو الكلب والحمار والفيل اللي ضيعوا مستقبلهم علي لا شيئ والمنتفع الاول والاخير بيوت الازياء ومحلات الملابس الروشه والمولات وكمان بياعين الروبابكيه مهي بعض بيوت الازياء بتطلع احدث صيحات الروبابكيه العالميه ويمكن دي الحاجه الوحيده اللي بيجبوها من مصر لانها متوفره بكثره وفي الاخر تبقي للموضه السياده علي عالم الشباب بلا عقول بل افواه مفتوحه وجيوب مثقوبه وشراشيب وكله موضه *موضه وربنا يخليلنا المصممين العالمين ويزودوا صيحات الموضه الهبله اقصد الرائعه اللي بتلهي الشباب عن المشاكل والقضايا وكل حاجه في دنيتهم ويفضلوا طول السنه مستنين احدث الجيبات والشرابات وشرايط عمرو دياب واحنا يعني عيزين ايه غير ان شبابنا يكون مرتاح ومكبر الدماغ اصلنا منحبش نكبره قبل سنه ولا نشغله بمواضيع تافهه متهموش علي الاطلاق ولا تاثر علي مستقبله خالص عشان كده قلنا نشغله في حاجه مفيده زي الموضه وشرايط عمرو دياب وعلي فكره سمعت انهم هيغيروا طريقه الامتحان وبدل ميبقي فيه جيولوجيا وعلم نفس وكمياء هيبقي فيه اختيارات في الشريط اللي كل طالب حافظه من( علم قلبي الدين) ( لكمل كلامك عن الفزياء )(للقلب الطيب وضغط الدم المرتفع ) وطبعا كل متجيب شرايط اكتر فرصتك في النجاح تكبر واهي فرصه تجيب فلوس وبيقولوا ان وزاره التربيه والتعليم متواطئه مع شركه عالم الفن وقناه روتانا عشان كده في امل الموظفين بالتربيه والتعليم مرتباتهم تزيد لو خدوا قرصات في حياه عمرو دياب وايهاب توفيق ولو انتشر التعليم ده اعتقد هتنهض البلد وتقاوم كل المعوقات والتحديدت دا غير ان الطلاب هتهيص دا اكيد ونناشد المسؤلين باسراع بتغير المناهج للتيسير علي الطلاب وحدوث تطور في عقول الطلاب في جميع المراحل ..............

خماسيات رحاب هاني في شكوي الزمن والتطور بالمعاني

هيا مش خماسيات ولا حاجه بس انا قلت علي وزن رباعيات صلاح جاهين يعني بس اش جاب لجاب طبعا دي مجرد اراء ومش لازم تكون صح

الي انا حاسه بيه دا ميتوصفش كانه العيد الكبير وانا الكبش ياناس حرام عليكوا ارحموني استاهل اعيش انا ولا مستهلش وانا لما افكر كتير بلاقيها كدا ولا كدا عندي متفرقش

الكون كله اتفق علي غدري و خداعي وان حبيت افرح القي الفرح ملوش داعي وايه يسعدك ياقليله الحيله وانتي في قمقم فيه حقد جماعي راعيتي ناس كتيره وانتهيتي علي يد ناس لم تراعي

يازمن الفلوس والحشيش واه علي كل عقل شاب في الزحمه تاه حزني علي الي راح مش هيرجعه لو حتي نهق عليه حمار وقال حاه


كان فيه زمان اميره بتحلم تعيش مع حبيبها لو حتي علي حصيره حلمت كتير ولكن احلامها عليها كانت كبيره ولما صحيت من النوم بكت اصلها لقت حبيبها خد كل حاجه حتي الحصيره

قالولي اتعلمتي ايه مالدنيا قلتلهم عيشه ضنك وناس فانيا قلتلهم طب ايه الحلو فيها قالوا ان كل حاجه كدب وحتي الحقيقه بتختفي في ثانيه

قال ايه الزمار بيموت وصوابعه بتلعب لا مات الزمار ولا لقي حاجه بيها يلعب وادي احنا عايشين بس عشان نتعب وفي النهايه لما حد يموت تلاقي محدش استغرب

سمعت حكمه بتقول الامل في الشباب طب واللي قالها عرف ان الشباب شعره من اللف شاب وكل يوم نحسب الحسبه نلاقي مستقبلنا مابين عواطليه او مرضي اكتئاب


والله يامه مغلطت ولا كنت خطيه وكل اللي حصل اني حلمت بعيشه منتهي الرفاهيه سفر وشوبنج وشغل من غير سيره فول ولا طعميه لقيت الكل بيضرب كف علي كف ويقول ليه هتاجري في المخدرات ولا هتنزلك الميه دهب مالحنفيه

شباب الجامعه دا تحفه بجد بيس وكول وصد ورد خلصت ايام الجامعه فوقوا احسن كل اللي اتبني بيجي وقت يتهد

فرحتي بيك وانت مسقط بنطلونك ولابس تيشرت مهوش علي لونك هي دي الروشنه يارجاله شكل وخلاص راح زمن الجدعنه دا حتي عيب علي عرضك وعلي طولك

زي مكان الهرم معجزه وكل واحد بيحلم بمحفظه بقي كرسي فاضي في الاتوبيس وقت الظهريه قصه فاكسه ولا متحلم بيوم من غير خناقه مابين الهوا الملوث وشوارعنا الي محتاجه مكنسه طب هناكل عند مؤمن ولا ماكدونلدز استنوا استنوا انا نسيت اني مفلسه

كل سنه وانتوا طيبين لا بقينا نزرع بلح ولا تين بس متقلقوش هنستورده بضعف التمن واللي هيستفيد ناس تانين ارضنا الخضرا بنينا عليها وهنستصلح الصحرا وادي ودن طين وودن من عجين


ياكلب سيب القطط تعيش اصلها مش فران مؤذيه ولا فرخه هتقصقصلها الريش مش هتبقي سيد لما يموت عبيدك وكفايه بقي زل وتطنيش مش كل حاجه مينفعش ومفيش

حمله تحديد النسل شغاله الي كل شاب وطفل وكهل واللي محتاج اعاله احنا لاقين ناكل نفسنا ياعم بطل ثقاله واللي عنده قرطه عيال يسربهم كل يوم واحد في كيس زباله

ياما قلنا الناس معادن وكنوز وادينا لا لقين ناكل ولا فيه مكان فيه ندوس فضلت الناس ومفيش فلوس واللي معاشرهمش هوه اللي بالبخت محظوظ


اهدو شويه ياشويه ديابه عايزين ايه احنا مش في غابه كله بيبص علي فوق وتحت ومش خايف لا من عقاب واحنا ياعيني غلابه ولا احنا نصابين ولا افراد في عصابه ليه بس قسيت علينا يابابا احنا لسه ولادك ولا انت اساسا مش فالنقابه

مين في حياتنا دي مغلطش مين اتمني يوم ميعش مين من جلده وهدومه في عز الغضب مطلعش واما يقول زهقت حرام يقولوا من ايه اما صحيح جحش

الحب دا بحر ملوش قرار مليان قرب وبعد وشوق وفرار وتقول انا بحب يوم ويوم تكره ولا حد يعرفلك حقيقه ولا اسرار وانت مين علمك ومين قلك انك اصلا تقدر تختار

في يوم ماشيه لقيت ديب له صوت عالي غشيم وكئيب قالي ارجعي لاكلك قلتله اه خوفتني خوف رهيب لو كنت قادر تكالني مكنتش حذرتني ولا كنت قلتلي دا عيب متخفش من حاجه لانك مهما خفت قدرك هيحصل هيحصل ولو مات بدل منك حد عنك غريب

ماما قالتلي يابنتي خدي بالك الدنيا كبيره محدش هيحبك قدي ولا تودي حد زي ودي الناس وحشه يابنتي واللي توديه لله يفتكرك لسبب تاني بتودي

ليه مت بس يابابا وسبتني وحدي في دنيا غابه امشي يمين ولا شمال ومين يخاف عليا ولا ليا ضهر اتسند عليه وبقالي سنين بدور للفرح علي بوابه ياتري حظي في الدنيا كبير وهيطلع حظي فيكي يادنيا ملك ولا كتابه


تعيس الرجا حتي لو كسبت المليون وفين تروح من بختك ويروح فين منك ياملعون ويوم ميجيلك الحظ ترفصه اه يامجنون

مش عايزه اعمل حاجه وكل منام بقوم مالنوم لاانا عارفه اكتب ملحمه ولا ناجحه حتي في طبق اليوم ايه تعملي يابنتي وانتي علي ارض من غير نجوم وكل مقول لحد عيب يقولي انتي عليكي اللوم

معذره.........

معذره
فلقد كان بقلبى لا بعقلى
التفكير .

معذرة ....
فلقد كانت الاحاسيس مقيده
والقلب اسير

معذرة .....
فربما كان الظلام هدوء
لكن النور احلى بكثير

ولماذا معذرة ...
فالحق احق ان يتبع
والعقل فى الحياه امير

ورائ عقلى ان اتنحى قبل
ان القى فى السعير

فجسدى لا يحتمل الكى بالكلمات
وعينى لا ترضى الهمس
الحقير .

وقلبى يداويه العشق الصادق
او ربما تداويه
العقاقير .

نعم .....
لقد كنت فى قلبى يوما
لكن القلب للعقل صغير

وكان لك بقلبى دنيا
جدارها الماس
وفراشها الحرير .

وبعيدة عن اى حقيقة
وغريبه حتى عن الاساطير .

معذره فقد خسرت ما ليس بالقليل
ولم تعد انت سوي هذا الفارس العليل
معذره لن اسمع بعد اليوم من الموسيقي غير العويل
معذره لقد تحول الحزن الي قصائد ومواويل
معذره اصبح اليوم الكي بالنار لي كضوء القناديل
معذره فليس لي الا الصمود والصبر وقيل لي ان الصبر جميل
معذره نسيت من انا وما اكون ولااتذكر سوي وضعي الذليل
كانت حياتي لك مرتع وكنت انت ذئب بلا عويل
كنت لي مكانا وحياه وبلادا ليس لها سبيل
كان لك عندي من الاوامر ما يستحق التفعيل
كنت الاول بغيرمنازع وبلا استخدام لاساليب التفضيل
فاذهب لقد كنت بلا عقل وكان القلب لك كدموع سقطت في منديل
معذره لقد كنت لي السماء والارض ولكن ربي عليك وكيل

ولم المعذره انها نهايه بدون معذره